२२ पुस, काठमाण्डौ । त्रिभुवन अन्तर्राष्ट्रिय विमानस्थलबाट एक किलो तीन सय ग्राम अवैध सुनसहित एकजना महिलालाई प्रहरीले पक्राउ गरेको छ।
गएराति फ्लाई दुबईको उडानबाट काठमाण्डौ आएकी श्रीलङ्काली नागरिक ५४ वर्षीया कान्थी माथी कावस्करलाई सुनसहित पक्राउ गरेको त्रिभुवन अन्तर्राष्ट्रिय विमानस्थलका सुरक्षा प्रमुख तथा प्रहरी नायब महानिरीक्षक अर्जुन चन्दले जानकारी दिनुभयो । ती महिलाले भित्री वस्त्रमा सुन लुकाएर ल्याएकी थिइन् ।
उनका अनुसार राहदानी नम्बर ८१५१३८५ भएकी निज महिलाले लगाएको ब्राभित्र प्लाष्टिकले बेरेको अर्धठोस सुन दुई पोका तौल पाँच सय ग्राम तथा लगाएको कट्टुभित्र आठ सय ग्राम सुन गरी कुल एक किलो तीन सय ग्राम सुन बरामद गरिएको हो। उक्त विषयमा थप अनुसन्धान भइरहेको प्रहरीले जनाएको छ।
विमानस्थलमा विभिन्न तरिकाबाट विभिन्न समयमा ६० किलो, ३३ किलो र ९ किलो सुन बरामद भइसकेको छ। ती प्रकरणमा छानविन समिति नै बनाएर अनुसन्धानसमेत भइरहेको छ।
कोहलपुर खबर । २२ पुष २०८०, आईतवार १४:३८