कर्णाली करिडोरमा आगामी आर्थिक वर्षमा कालोपत्रको काम हुने भएको छ। कर्णाली करिडोर सडक निर्माणको काम सम्पन्न भइसकेको र स्तरोन्नति सकिएपछि सडक विभागले कालोपत्र गर्ने कामलाई अगाडि बढाएको हिल्सा-सिमकोट सडक आयोजनाका प्रमुख वीरेन्द्रकुमार यादवले बताए।
‘खुलालु लैफु हुँदै सलीसल्लासम्मको सडकलाई कालोपत्र गर्ने काम शुरु भएको छ,’ उनले भने, ‘पहिलोपटक सडक कालोपत्र हुन लागेको हो।’
कालोपत्रका लागि सडक विभागले डिपिआर बनाइसकेको र आगामी आवमा सडक कालोपत्र शुरु हुने आयोजना प्रमुख यादवले जानकारी दिए।
‘कालोपत्र सडक दुई लेनको हुनेछ, डिपिआर चाँडै तयार हुने र त्यसपछि विभागले बजेटको व्यवस्था गरेलगत्तै काम शुरु हुनेछ,’ उनले भने, ‘बजेटको लागत अनुमान भइरहेको छ, आगामी आवमा बजेटको व्यवस्था भएर कालोपत्र शुरु हुन्छ।’
कालीकोटदेखि हुम्लाको सलिसल्लासम्मको लम्बाइ १ सय २२ किलोमिटर रहेको र कालोपत्र गर्न कम्तीमा ४ देखि ५ वर्ष लाग्ने प्रमुख यादवले बताए।
कालोपत्र गर्न पूर्वका सडकलाई चौडा पार्ने, मोड सुधार गर्ने काम भइरहेको र यसका लागि ६ वटा निर्माण कम्पनीमार्फत काम भइरहेको यादवले जानकारी दिए। ‘८ करोड लगानीमा अहिले सडक सुधार भइरहेको छ,’ उनले भने।
कोहलपुर खबर । १३ फाल्गुन २०७९, शनिबार १३:०२