१३ बैशाख, कोहलपुर । बाँकेको कोहलपुरमा आगामी बैशाख १५ गतेदेखि मैत्रीपूर्ण क्रिकेट प्रतियोगिता हुने भएको छ ।
कोहलपुरको प्रस्तावित अन्तर्राष्ट्रिय क्रिकेट मैदानमा अनलाईन टिभि पत्रकार संघ बाँकेको आयोजनामा बैशाख १५ गते देखि १८ गते सम्म मैत्रीपूर्ण क्रिकेट प्रतियोगिता हुने भएको हो । मुख्य आयोजक अनलाईन टिभि पत्रकार संघ बाँकेले विहिबार कोहलपुरमा पत्रकार सम्मेलन गरी बैशाख १५ गते देखि प्रतियोगिता हुन लागेको जानकारी दिएको हो ।
नक आउट चरणमा हुने प्रतियोगिताको विजेताले ३० हजार रुपैयाँ र दोस्रो हुनेले १५ हजार रुपैयाँ प्राप्त गर्ने अनलाईन टिभि पत्रकार संघ बाँकेका अध्यक्ष कृष्णराज अधिकारीले बताए । अध्यक्ष अधिकारीले पछिल्लो समय नेपालिहरुको क्रिकेट प्रतिको मोह बढ्दै गएकोले बाँकेमा जिल्लामा पनि क्रिकेटको विकास गर्ने उद्देश्यले प्रतियोगिता सञ्चालन गर्न लागिएको बताए ।
प्रतियोगितामा बिभिन्न पेशागत संघ संगठन गरी २० भन्दा बढि टिमको सहभागीता हुने अनलाईन टिभि पत्रकार संघ बाँकेका सचिब केष बहादुर खड्काले जानकारी दिए । प्रतियोगिताका हरेक खेल आइसीसीको नियमानुसार सञ्चालन गरिने खड्काले बताए । पत्रकार सम्मेलनमा अनलाईन टिभि पत्रकार संघ बाँकेका उपाध्यक्ष सुर्य बहादुर कार्की, सह-सचिव कुशल विश्वकर्मा लगायत विभिन्न मिडियाका पत्रकारहरुको सहभागीता रहेको थियो ।
कोहलपुर खबर । १३ बैशाख २०८१, बिहीबार १६:४७