६ असोज, मुगु । मुगुको गमगढी बजारमा आगलागी हुँदा आठ घर जलेर नष्ट भएको छ ।
गएराति १२ बजे एउटा कम्युटर पसलबाट सल्किएको आगो बजारमा फैलिएको मुगुका डीएसपी वीरेन्द्र थापाले जानकारी दिए । आगलागीबाट तार्के लामा, सोनाम लामा, जङ ऐडी, सान्तोना खत्री, पञ्च सेजुवाल, पीआर मल्ल, प्रदीप रावल र पुतली शाहीको घर जलेर नष्ट भएको हो ।
बजारमा अधिकांश घर काठले बनेका कारण पनि छिटो आगो सल्किएको डीएसपी थापाले बताए। आगलागी नियन्त्रणमा समस्या भएपछि जंग शाहीको घर समेत भत्काइएको थियो । करिब पाँच घण्टापछि नेपाल प्रहरी, रेडक्रस नेपाल र समुदायको सक्रियतामा आगो नियन्त्रणमा लिइएको थियो ।
आगलागीपछि घरमाथिबाट हाम फाल्ने क्रममा एक महिला घाइते भएकी छिन् । उनको उपचार भइरहेको डिएसपी थापाले जानकारी दिए। आगलागीबाट भएको क्षतिकोपूर्ण विवरण आई नसकेको प्रहरीले जनाएको छ ।
यसअघि २०७८ कात्तिक २९ गते गमगढी बजारको तल्लो बजारमा पनि आगलागी हुँदा १९ घर जलेर नष्ट भएका थिए ।
कोहलपुर खबर । ६ आश्विन २०८०, शनिबार १०:३१