१० असार, कोहलपुर । बाँके बैजनाथ गाउँपालिकाले १३ औं गाँउसभाबाट आर्थिक वर्ष २०८०/०८१ का लागी ६९ करोड ९९ लाख ३५ हजार ९ सय ७५ रुपैयाको बजेट प्रस्तुत गरेको छ । बैजनाथ गाउँपालिका उपाध्यक्ष निर्मला रोकायाले आईतबार आर्थिक वर्ष २०८०/०८१ लागि कूल ६९ करोड ९९ लाख ३५ हजार ९सय ७५ रुपैयाको बजेट प्रस्तुत गरेकी हुन ।
संघिय समानीकरण रकम १५ करोड २० लाख, प्रदेश सरकार समानीकरण १ करोड १४ लाख ६३ हजार, संघिय सरकार सशर्त चालु रकम २९ करोड ७ लाख, संघिय सरकार सशर्त पूजिगत रकम २ करोड ८८ लाख, प्रदेश सरकार सशर्त चालु १६ लाख ५० हजार, प्रदेश सरकार सशर्त पुँजीगत रकम ६५ लाख, संघीय सरकार विशेष अनुदान रकम १ करोड, संघीय सरकार समपुरक अनुदान रकम ६० लाख, प्रदेश सरकार समपुरक अनुदान रकम १ करोड, संघिय सरकार राजश्व रकम १२ करोड ५६ लाख ८४ हजार, प्रदेश सरकार राजश्व रकम ७१ लाख ३८ हजार ९७५, आन्तरीक आय ३ करोड ५० लाख, घर जग्गा रजिस्ट्रेसन बापत मालपोत कार्यालयबाट प्राप्त हुने रकम करिब १ करोड ५० लाख गरी कूल ६९ करोड ९९ लाख ३५ हजार ९ सय ७५ रुपैयाको बजेट १३ औं गाँउसभामा उपाध्यक्ष रोकायले प्रस्तुत गरेकी हुन ।
प्रस्तुत बजेटमा बैजनाथ गाउँपालिकामा रहेका ८ वटै वडाहरु तथा पालिकालाई भौतिक पूर्वाधार तर्फ ६ करोड ९६ लाख, स्वास्थ्य सेवा अन्तर्गत गाउँपालिकाका थप बर्थिंग सेन्टरमा एम्बुलेन्स सेवा सुरु गर्न १२ लाख, बर्थिंग सेन्टरमै शिशु जन्माउने सुत्केरी तथा नवजात शिशुलाई उपलब्ध गराउदै आएको १ हजार मा १५ सय थप गरी २५ सय पोषण प्रोत्साहन, सिकलसेल अनिमिया स्वास्थ्य परिक्षण तथा जनचेतनामुलक कार्यक्रम संचालनको लागि प्रदेश सरकारबाट प्राप्त बजेटमा थप गरी कुल १० लाख बजेट बिनियोजन गरिएको छ ।
त्यसै गरी एक वडा एक नर्सिंग कार्यक्रम अन्तर्गत सम्बन्धित वडा भित्रका सम्पूर्ण सामुदायिक बिद्यालयमा सेवा दिने गरी सेवा करारमा बिद्यालय स्वास्थ्यकर्मीको ब्यबस्थाका लागी ४० लाख, स्थानीय पाठ्यक्रम कार्यन्वयन गर्न १० लाख, कम्प्युटर तथा लेखा तालिम र बिज्ञान प्रयोगशाला संचालनको लागि आवश्यक तालिम गर्न ७ लाख, दलित, द्वन्दपडित, सहिद, बेपत्ता र घाइतेपरिवारका छात्रालाई प्राबिधिक शिक्षामा पहुँच वृद्धि गर्न छात्रवृत्ति १० लाख, खेलकुदको विकास र प्रवर्धन तथा प्रतियोगिता संचालनका लागि १० लाख, आधारभुत तह र माध्यमिक तह शिक्षण अनुदानको लागि १ करोड ७५ लाख, कक्षा ११ र १२ मा गाउँपालिका भित्र संचालन भएका सामुदायिक बिद्यालयहरुमा छात्राहरुको संख्या वृद्धि गर्नको लागि बिद्यालयले लिने मासिक शुल्कमा ५० प्रतिशत छुट दिनको लागि छात्रवृत्ति २० लाख, बिद्यालयहरुलाई टिन मुक्त अभियानका लागि १५ लाख, गरिब तथा बिपन्न परिवारका छात्राका उच्च शिक्षामा पहुँच वृद्धि गर्नको लागि ८ लाख रकम बिनियोजन गरिएको छ ।
त्यसैगरी सामाजिक समावेशिकरणमा ३३ लाख, खानेपानी तथा सरसफाइमा ४० लाख, आर्थिक विकास तर्फ पशु सेवामा ८४ लाख, कृषिसेवा तर्फ ४ करोड ८० लाख, पर्यटन, घरेलु उद्योग तथा सहकारी तर्फ ४० लाख, सुकुम्वासी तथा अव्यबस्थित बसोबासीका लागी २० लाख, एक वडा एक बगैचा कार्यक्रम संचालनका लागि ८ लाख, न्याय सम्पादनलाई प्रभाबकारी बनाउन ५ लाख बजेट बिनियोजन गरिएको छ ।
यस अघि शनिबार आगामी आर्थिक वर्षका लागी प्रस्तुत गरीएको नीति तथा कार्यक्रममा कृषिमा बिशेष जोड दिएको छ । आत्म निर्भर गाउँपालिका निमार्णका निम्ति गाउँपालिकाका सबै वडामा तरकारी संकलन केन्द्रको स्थापना गरी कृषि उत्पादनलाई बजारीकरण गर्ने, स्थानीय उत्पादनलाई लाई बजार सम्म पुर्याउन र स्वरोजगार र आत्म निर्भर समाजको परिकल्पना गर्नका लागी किसान सँग पालिका प्रमुख कार्यक्रमलाई निरन्तरता दिने, रासायनिक मलको प्रयोगलाई न्यूनिकरण गरी प्रांगारिक मलको उत्पादन बढाउन विशेष जोड दिइने, स्वास्थ्य ,शिक्षा, खानेपानी तथा सरसफाइ कृषि तथा सिँचाइ र भू उपयोग ,सहकारी पशुपन्छी र मत्स्यपालन ,युवा तथा खेलकुद ,भौतिक पूर्वाधार ,बन वातावरण तथा विपद व्यवस्थापन ,सुशासन तथा सेवा प्रवाह , समावेशीकरण ,दलित ,क्षेत्रको समग्र विकासका निम्ति गाउँपालिकाले आर्थिक वर्ष २०८०/०८१ को मुख्य रुपमा नीति तथा कार्यक्रम ल्याइएको गाउँपालिका अध्यक्ष शाहीले प्रस्तुत गरेको नीति तथा कार्यक्रममा उल्लेख छन ।
कोहलपुर खबर । ११ असार २०८०, सोमबार ०१:२३