कोहलपुर । लघुवित्त कर्मचारी मञ्च कोहलपुर बाँकेले विभिन्न वित्तीय संस्थाहरूसँग समन्वय गर्दै कोहलपुरका विभिन्न स्थानमा वित्तीय साक्षरता अभिमुखीकरण तथा सन्देशमूलक र्याली कार्यक्रम सञ्चालन गरेको छ । लघुवित्तले विश्व वित्तीय सप्ताह २०२५ को अवसरमा कार्यक्रम गरेको हो ।
विश्व वित्तीय सप्ताह २०२५ लाई सार्थक र सफल पार्न ग्रामीण समुदायमा लक्षित गरी वित्तीय सचेतना फैलाउने उद्देश्यका साथ लघुवित्त कर्मचारी मञ्च कोहलपुर बाँकेले वित्तीय साक्षरतासम्बन्धी अभिमुखीकरण तथा सन्देशमूलक र्याली कार्यक्रमको आयोजना गरिएको हिमालय लघुवित्त वित्तीय संस्थामा कार्यरत कर्मचारी लोकेन्द्र देव भट्टले जानकारी दिए ।
संस्थासंग आबद्ध सदस्यहरू तथा लघुवित्तका कर्मचारीहरूको सहभागिता लघुवित्त कर्मचारी मञ्च कोहलपुरले कोहलपुरको मुख्य स्थानमा आफ्नो कार्यक्रमको आयोजना गरी वित्तीय साक्षरता अभिमुखीकरणका साथै वित्तीय साक्षरता झल्काउने नाराहरूको प्लेकार्डसहितको र्याली कार्यक्रम गरिएको हो ।
यसबाट समुदायस्तरमा रहेका सदस्यहरूलाई वित्तीय कारोबार, दैनिक आम्दानी तथा खर्चको विश्लेषण गर्न, बचत गर्ने बानी, कर्जाको सही सदुपयोग, वित्तीय सेवासम्बन्धी ज्ञान, व्यवसाय व्यवस्थापन, बिमा, विप्रेषण आदिजस्ता कुराहरूमा चेतना वृद्धि भई आर्थिक व्यवस्थापनमा सहज हुने संस्थाले विश्वास व्यक्त गरेको छ ।
कोहलपुर खबर । ७ चैत्र २०८१, शुक्रबार १९:२४