सिद्धार्थ बैंक नेपाल प्रिमियर लिग (एनपिएल) मा बिहीबार दोस्रो क्वालिफायरको खेल हुँदैछ ।
दोस्रो क्वालिफायरमा कर्णाली याक्सले जनकपुर बोल्ट्सको सामना गर्दैछ । त्रिवि मैदान कीर्तिपुरमा मध्याह्न १२ बजे खेल सुरू हुनेछ । बुधबार इलिमिनेटरमा चितवन राइनोजलाई २१ रनले पराजित गर्दै कर्णालीले दोस्रो क्वालिफायरमा स्थान सुरक्षित गरेको थियो ।
चितवनविरूद्धको खेलमा कर्णालीका लागि डेब्यु गरेका भारतीय ब्याट्सम्यान जयकिशन अनिलभाइ कोल्सावालाले पावर प्ले सम्हालेका थिए। पछि विलियम बसिस्टो र चाडविक वाल्टनले पनि सानदार ब्याटिङ गरेपछि कर्णालीले चितवनविरूद्ध फराकिलो स्कोर जोडेको थियो । जिशन मक्सुद, नन्दन यादव र सोमपाल कामीले बलिङ सम्हाल्दा कर्णाली क्वालिफायरमा पुग्न सफल भएको थियो ।
समूह चरणको खेलपछि शीर्ष चारमध्ये दोस्रो स्थानमा रहेको जनकपुर पहिलो क्वालिफायरमा सुदूरपश्चिमसँग पराजित भएपछि दोस्रो क्वालिफायर खेल्नुपर्ने अवस्थामा पुगेको हो । जनकपुरका कप्तान अनिल साहले चोटका कारण पहिलो क्वालिफायर गुमाएका थिए । आजको खेलमा उनी फर्कन्छन् फर्कदैनन् भन्ने जानकारी टिमले औपचारिक रूपमा दिएको छैन। अनिलको अनुपस्थितीले जनकपुरको टिमलाई केही असर भने पार्नेछ जसको फाइदा कर्णालीले उठाउन सक्छ ।
लिग चरणको खेलमा भने जनकपुरले कर्णालीलाई सजिलोसँग हराएको थियो। त्यतिबेला कर्णालीले दिएको १४१ रनको लक्ष्य जनकपुरले २ विकेट मात्र गुमाएर १५.१ ओभरमै भेट्टाएको थियो । आजको विजेताले उपाधिका लागि सुदूरपश्चिम रोयल्ससँग खेल्नेछ ।
जनकपुरका मार्की खेलाडी आशिफ शेखले कर्णालीलाई फेरि जितेर फाइनलमा पुनः सुदूरपश्चिमसँगको भेट पक्का गर्ने आशा व्यक्त गरेका छन् । ‘विश्वास छ कि फाइनलमा हाम्रो भेट हुन्छ र जित्छौं,’ बुधबार सुदूरपश्चिमसँगको खेलपछि उनले भनेका थिए ।
कोहलपुर खबर । ४ पुष २०८१, बिहीबार १०:३८