कोहलपुर । उपप्रधान तथा गृहमन्त्री नारायणकाजी श्रेष्ठ प्रकाशुले आमसर्वसाधारणमा ट्राफिक सचेतना अभिबृद्धि गर्दै सडक अनुशासन कायम गर्नका लागि सबैलाई प्रेरित गर्न आवश्यक रहेको बताएका छन् । सडक अनुशासन तथा सवारी दुर्घटना न्यूनिकरणका लागि लुम्बिनी प्रदेश प्रहरी कार्यालय, राजमार्ग सुरक्षा तथा ट्राफिक ब्यवस्थापन कार्यालय बुटवल र जिल्ला प्रहरी कार्यालय बाँकेको सहकार्य तथा नेपालगन्ज उपमहानगरपालिका र कोहलपुर नगरपालिकाको आयोजनामा ट्राफिक सप्ताह सुरु गरिएको थियो । गृहमन्त्री श्रेष्ठले सवारी दुर्घटना न्यूनीकरणका लागि सबै पक्षको इमान्दारिता र सक्रियता आवश्यक रहेको बताए ।
उक्त सप्ताहको धम्बोझी चोकमा कार्यक्रमका प्रमुख अतिथी तथा उपप्रधान एवम् गृहमन्त्री नारायणकाजी श्रेष्ठले औपचारिक रुपमा उद्घाटन गरेका छन् । कार्यक्रमलाई सम्बोधन गर्दै श्रेष्ठले भने, ‘एउटा कुनै पक्षले मात्रै यसको समाधान गर्न सक्दैन, सवारी मार्ग, सडकको गुणस्तर, सवारी साधनको गुणस्तर, साथ साथै सवारी चालक, यात्रुको चेतना र अनुशासनको स्थिती, ट्राफिक प्रहरीको ऐन नियम लागुगर्ने प्रतिवद्धता र सक्रियताबाट मात्र सकारात्मक परिवर्तन ल्याउन सक्छौं ।’ सरकारले ट्राफिक सप्ताहमार्फत मुख्य त ट्राफिक नियमको जानकारी गराउने र यो सडक दुर्घटनाको कारण जानकारी गराउने र त्यसबाट बच्नको निम्ति ट्राफिक अनुशासन कायम गर्ने नै मुख्य पक्ष हुन आउने बताए ।
कोहलपुर खबर । १० फाल्गुन २०८०, बिहीबार १३:१२