२२ असार, कोहलपुर । कोहलपुर नगरपालिका–४ पशुपतिनगरमा अवस्थित सगरमाथा ज्ञानपुञ्ज माध्यमिक विद्यालयमा आर्थिक चन्दा संकलन गरेर सरस्वती माताको मन्दिर निर्माण गरिएको छ ।
विधालयका शिक्षकहरुको सहयोग विभिन्न व्यक्ति र संस्थाहरूको सहयोग संकलन गरेर सरस्वती माताको मन्दिर स्थापना गरेको विद्यालय व्यवस्थापन समितिका अध्यक्ष अर्जुन पौड्यालले बताए ।विद्यालय परिसरमा स्थापना गरिएको सरस्वती मन्दिरको बिहीबार उद्घाटनसमेत गरिएको छ‘विद्यालयमा विद्याकी देवी सरस्वती माताको मन्दिर थिएन् । चन्दा संकलनबाटै मन्दिर स्थापनाको पहल थालेका थियौं । सफल पनि भयौं । खुसी लागेको छ,’ उनले भने, ‘यो कार्यमा साथ दिने सबैलाई मेरो व्यक्तिगत र विद्यालयको तर्फबाट धन्यवाद दिन चाहन्छु ।’
मन्दिर स्थापनाको कार्यक्रमका अवसरमा बोल्दै लुम्बिनी प्रदेश सांसद कृष्णा केसी (नमुना)ले विद्यालयको भौतिक तथा शैक्षिक सुधारका लागि आफूले सक्ने सहयोग गर्ने बताइन् । ‘मेरो निर्वाचन क्षेत्र यहाँ नभए पनि मेरो घर र मत हाल्ने क्षेत्र चाहिँ यही नै हो,’ सांसद नमुनाले भनिन्, ‘कोहलपुरको विकासमा मेरो सधैं चासो र चिन्ता रहन्छ । आफ्नो ठाउँबाट गर्ने सहयोग म गर्छुँ ।’ विद्यालयको भौतिकसँगै शैक्षिक गुणस्तरसमेत राम्रो हुनुपर्नेमा उनले जोड दिइन् । विद्यालयलाई यस क्षेत्रकै उत्कृष्ट सामुदायिक विद्यालय बनाउनुपर्ने सांसद नमुनाले बताइन् । साथै सांसद कृष्णा केसी (नमुना)ले मन्दिरको उद्घाटन पनि गरेकी हुन ।
सो अवसरमा मन्दिरमा स्थापना सहयोग गर्ने विभिन्न व्यक्तिहरूलाई दोसल्ला ओढाएर सम्मानसमेत गरिएको थियो । विद्यालयका प्रधाननध्यापक मोहन चौधरीले तीन लाख २२ हजार दुई सय ४९ रूपैयाँमा सरस्वती मन्दिर निर्माण सम्पन्न भएको जानकारी दिए । ‘सबैबाट सहयोग संकलन नै गरेर मन्दिर स्थापना भएको हो,’ उनले भने, ‘विद्यालय परिसरमै विद्याकी देवी सरस्वती माताको मन्दिर निर्माण भएपछि विद्यार्थीहरूलाई समेत सहज हुन्छ ।’
मन्दिर स्थापना कार्यक्रममा अभिभावक, शिक्षक, विद्यार्थी, विद्यालय व्यवस्थापन समितिका सदस्यलगायत को सहभागिता रहेको थियो ।
कोहलपुर खबर । २२ असार २०८०, शुक्रबार १२:२७