२७ असार, ललितपुर / नेपाली कांग्रेसका महामन्त्री गगन थापाले संवैधानिक परिषदसम्बन्धी विधेयक फिर्ता हुने बताएका छन्। राष्ट्रिय सभामा दर्ता भएको विधेयक केही दिनमा फिर्ता हुने उनले बताए ।
सोमबार ललितपुरमा आयोजित एक कार्यक्रममा बोल्दै गगन थापाले संवैधानिक परिषदसम्बन्धी दर्ता भएको विधेयक अघि बढाउन नसकिने स्पष्ट पारेका हुन् ।
‘संवैधानिक परिषदसम्बन्धी राष्ट्रिय सभामा दर्ता विधेयक केही दिनमा फिर्ता हुन्छ,’ थापाले भने, ‘हिजो केपी शर्मा ओली प्रधानमन्त्री हुँदा त्यो विधेयक गलत थियो भनेका थियौं । हिजो गलत भनेका विषयलाई अहिले सही भनेर अघि बढाउन सकिन्न । त्यो विधेयक फिर्ता हुन्छ ।’
उनले संवैधानिक परिषदसम्बन्धी विधेयक फिर्ता लिनेबारे प्रधानमन्त्रीसमेत रहेका सभापति शेरबहादुर देउवासँग कुराकानी भइसकेको पनि बताए ।
‘संवैधानिक परिषदसम्बन्धी विधेयकलाई गम्भीरतापूर्वक रूपमा लिएका छौं,’ उनले भने । संवैधानिक परिषदमा ६ जना रहने व्यवस्था छ । हाल उपभामुख पद रिक्त छ । सरकारले ल्याएको विधेयकअनुसार अब तीन जना भए मात्र पनि संवैधानिक निकायमा नियुक्ति गर्ने बाटो खुल्नेछ ।
यो पनि हेर्नुहोस्
कोहलपुर खबर । २७ असार २०७९, सोमबार ११:१०