२४ भदौ, कोहलपुर । आज विश्व आत्महत्या रोकथाम दिवस, नेपालमा पनि विभिन्न कार्यक्रम गरी मनाइँदैछ । “आशा जगाऔँ, जीवन बचाऔँ” भन्ने नाराका साथ विश्व आत्महत्या रोकथाम दिवसको अवसरमा कोहलपुरमा अन्तरक्रिया कार्यक्रम सम्पन्न भयको छ । विश्व आत्महत्या रोकथाम दिवसका अवसरमा सुरक्षाकर्मी, स्वास्थ्यकर्मी तथा संचारकर्मीहरुसँग अन्तरक्रिया कार्यक्रम गरिएको हो ।
अन्तरक्रिया कार्यक्रममा बोल्दै नेपालगन्ज मेडिकल कलेज शिक्षण अस्पताल कोहलपुरका वरिष्ठ मानसिक रोग विशेषज्ञ समेत रहेका डा. मोहन वेल्वासेले पछिल्लो समय विश्वभर आत्महत्या गर्ने क्रम बढ्दै गएको बताए । वेल्वासेले पछिल्लो समय सामाजिक तथा पारिवारीक कारणले गर्दा समेत यस्ता घटनाहरु बढ्दै गएकोले आत्महत्या आफैमा जटिल विषय भएकाले यसको रोकथामकालागी समाजका सबै पक्षहरु सचेत हुनुपर्ने बताएका हुन । डा. वेल्वासेले राज्यले आत्महत्या रोकथामकालागि गर्नुपर्ने पहल प्रयाप्त नभएको जिकिर गर्दैे आत्महत्या जस्तो संवेदनशिल विषयमा स्वय परिवार र समाज थप जिम्मेवार हुनुपर्ने धारणा राखेका थिए । डा. वेल्वासेले मनोपरामर्श मार्फत ब्यक्तिको समस्या पहिचान गरी उसलाई नयाँ जिवन दिन सकिने पनि बताए ।
अन्तरक्रिया कार्यक्रममा बोल्दै ईलाका प्रहरी कार्यालय कोहलपुरका डिएस्पी सुन्दर तिवारीले पछिल्लो तथ्याङ्क अनुसार बाँकेमा २९ जनाले आत्महत्या गरेकोे बताए । तिवारीका अनुसार आर्थिक वर्ष २०७९÷८० मा देशभरबाट छ हजार ९९३ जनाले आत्महत्या गरेका छन्। यो सङ्ख्या अघिल्लो आर्थिक वर्ष भन्दा २.३९ प्रतिशतले बढी हो । आर्थिक वर्ष २०७८÷७९ मा छ हजार ८३० जनाले आत्महत्या गरेका थिए । तिवारीका अनुसार ’आर्थिक, सामाजिक , पारिवारिक ,प्रेममा धोका, साथीभाइसँगको झगडा, मनमुटाव, अपराध पीडित, लागू औषध दुव्र्यसन, मानसिक समस्या, घरेलु हिंसा, लैंगिक हिंसा जस्ता कारणले व्यक्तिले आत्महत्या गर्ने बताए । नेपालमा आत्महत्याका घटना बढ्दै गएकोले उनले संचार क्षेत्रलाई आत्महत्या जस्तो संवेदनशिल विषयलाई उठान गर्दा विशेष सावधानी अपनाउनुपर्ने बताए ।
अन्तरक्रिया कार्यक्रममा कोहलपुर नगरपालिकाका प्रमुख पूर्ण प्रसाद आचार्यको सभापत्त्विमा स्वास्थ्यकर्मी, प्रहरी तथा संचारकर्मीको उपस्थिती रहेको थियो । विश्व स्वास्थ्य सङ्गठनका अनुसार हरेक वर्ष आत्महत्याका कारण विश्वमा ७ लाखभन्दा धेरैले ज्यान गुमाउने गरेका छन् ।
कोहलपुर खबर । २४ भाद्र २०८०, आईतवार १८:३९