१३ कार्तिक , जुम्ला । दिपबहादुर स्मृति क्रियाशील पत्रकारिता पुरस्कार जुम्लाका क्रियाशील पत्रकार विजय रावतलाई प्रदान गरिने भएको छ ।
कार्तिक १३ गते बसेको स्व।दिपबहादुर स्मृति छनोट समितिको बैठकले यस वर्षको पुरस्कार पत्रकार रावतलाई प्रदान गर्ने निर्णय गरेको हो । उक्त पुरस्कार यही कात्तिक १५ गते एक कार्यक्रमका बीच प्रदान गरिनेछ । पत्रकार रावत विकट कर्णालीको जुम्लामा रही सक्रिय पत्रकारिता गर्दै आएका छन् । उनी राष्ट्रिय समाचार समिति (रासस) र हिमालयन टाईम्समा कार्यरत छन् ।
जुम्ला जिल्ला मै पहिलोपटक निजी स्तरबाट वितरण सुरू गरिएको पुरस्कारको राशी १० हजार रहको छ । उनलाई कार्तिक १५ गते एक समारोहबीच पुरस्कृत गरिने छ । पत्रकार रावत यसै वर्ष प्रेस काउन्सिल नेपालले प्रदान गरेको युवा पत्रकारिता पुरस्कारबाट सम्मानित भएका थिए ।
हरेक वर्ष कर्णाली क्षेत्रबाट क्रियाशील पत्रकारलाई प्रदान गरिने स्व. दिपबहादुर स्मृति क्रियाशील पत्रकारिता पुरस्कार अघिल्लो वर्ष पत्रकार सागर परियारलाई प्रदान गएको थियो । स्व. दीपबहादुर स्मृति प्रतिष्ठान,जुम्लाले हरेक वर्ष जुम्ला र बाँके जिल्लामा क्रियाशील पत्रकारिता गरिरहेका सक्रिय पत्रकारलाई पाँच हजार र १० हजार राशीको पुरस्कार वितरण गर्दै आएको छ ।
स्व. दिपबहादुर स्मृति क्रियाशील पत्रकारिता पुरस्कार प्रत्यक बर्ष बाँकेमा पनि प्रदान हुदै आएको छ । प्रत्यक बर्ष प्रेस सेन्टर कोहलपुर नगरको बार्षिक उत्सबको अबसरमा स्व. दिपबहादुर स्मृति क्रियाशील पत्रकारिता पुरस्कार प्रदान गर्ने गरीएको छ । यस बर्ष बाँकेबाट क्रियाशील पत्रकार अनिता बिश्वकर्मालाई स्व. दिपबहादुर स्मृति क्रियाशील पत्रकारिता पुरस्कारबाट पुरस्कृत गरीएको थियो ।
कोहलपुर खबर । १३ कार्तिक २०८०, सोमबार २२:२६