पूर्वपश्चिम राजमार्ग अन्तर्गत बाँकेको राप्तीसोनारी गाउँपालिकामा गएराति टिपरले ठक्कर दिँदा मोटरसाइकल चालकको ज्यान गएको छ ।
राप्तीसोनारी ९ स्थित ढकेरीमा टिपरको ठक्करले राप्तीसोनारी गाउँपालिका-८ का ३५ वर्षीय लोकेन्द्र विष्टको ज्यान गएको हो । जिल्ला प्रहरी कार्यालय बाँकेका प्रवक्ता एवं सूचना अधिकारी प्रहरी नायब उपरीक्षक नारायण डाँगीका अनुसार गएराति साढे ९ बजेतिर कोहलपुरबाट पूर्वतर्फ जाँदै गरेको भे १ ख ३०१९ नम्बरको टिपरले पूर्वबाट आउँदै गरेको भे १० प १४१३ नम्बरको विष्ट सवार मोटरसाइकललाई ठक्कर दिएको थियो । विष्टको घटनास्थलमै ज्यान गएको हो ।
दुर्घटनापश्चात् टिपर चालक फरार रहेको गाडीका मालिक भने सम्पर्कमा आएको प्रहरीले जनाएको छ । स्थानीयले ठक्कर दिने टिपरमा आगजनी गरेको र सडक अवरुद्ध पारेको डाँगीले जानकारी दिए । सडक खुलाउन प्रहरीले पहल गरिरहेको छ ।
साथै फरार रहेका टिपर चालकको पनि खोजतलास भइरहेको डाँगीले जानकारी दिए ।
कोहलपुर खबर । १ असार २०८१, शुक्रबार ११:२६