२२ साउन,दार्चुला । दार्चुलामा आइतवार राति चरेससहित दुई जना पक्राउ परेका छन्। दुवै जनालाई हिजो राति शैल्यशिखर नगरपालिकाको कर्कलेबाट इलाका प्रहरी कार्यालय गोकुलेश्वर तथा जिल्लाबाट खटिएको प्रहरी टोलीले पक्राउ गरेको हो । प्रहरीले पक्राउ परेका दुवै जनाको साथबाट ६ केजी १ सय ग्राम चरेश बरामद गरेको छ । गोप्य सूचनाको आधारमा उनीहरुलाई पक्राउ गरिएको प्रहरीले जनाएको छ ।
महाकाली नगरपालिका–४ खलङ्गा बस्ने ६६ वर्षका मानसिंह ठगुन्ना र नौगाड गाउँपालिका वडा ४ सिप्टीका ७० वर्षका गौरसिंह ठगुन्नालाई पक्राउ गरिएको जिल्ला प्रहरी कार्यालय दार्चुलाका प्रहरी निरीक्षक एवम् सूचना अधिकारी ज्ञानेन्द्रबहादुर सिंहले जानकारी दिनुभयो ।
पक्राउ परेका दुवैजनालाई थप अनुसन्धान गर्न गोकुलेश्वरबाट दार्चुला ल्याउन लागिएको जिल्ला प्रहरी कार्यालय दार्चुलाले जनाएको छ ।
कोहलपुर खबर । २२ श्रावण २०८०, सोमबार १२:००