शिक्षा अधिकृतलाई कुटेको आरोपमा वडाध्यक्ष पक्राउ

८ असार, दाङ । दाङको शान्तिनगर गाउँपालिका –२ का वडा अध्यक्ष सुनिल वली पक्राउ परेका छन् ।

वडाध्यक्ष वलीले बिहीबार दिउँसो ४ बजे शान्तिनगर गाउँपालिकाको कार्यालयमा प्रवेश गरि प्रमुख प्रशासकीय अधिकृत डिल्ली खड्काको कार्यकक्षमा शिक्षा अधिकृत सुमन पाण्डेलाई कुटपिट गर्दै कागजात च्याते पछि उनिबिरुद्ध इलाका प्रहरी कार्यालय तुलसीपुरमा शुक्रबार उजुरी परेको थियो ।

वडा अध्यक्ष वलीलाई जिल्ला प्रहरी कार्यालय दाङको टोलीले नारायणपुरबाट पक्राउ गरेको जिल्ला प्रहरी कार्यालय दाङका डीएसपी राजन गौतमले जानकारी दिए ।

पक्राउ परेका वडा अध्यक्ष वलीलाई जाहेरीका आधारमा आजै म्याद थप गरेर कानुनी कारबाही अघि बढाउने डीएसपी गौतमले जानकारी दिए । अनुसन्धानका लागि आजै म्याद थप गरेर इलाका प्रहरी कार्यालय तुलसीपुरमा पठाउने तयारी गरिएको छ ।